廣東話 CCL 筆記技巧：唔係抄晒，係揀啱嗰幾樣

細節先係扣分嘅嘢

廣東話考生喺聽嗰邊好少出事。GP 講咩、Centrelink 電話入面嗰堆程序，聽得明。出事係聽完之後：冇得翻聽，一個片段最多約 35 字，你要即刻將入面每件事完整咁講返出嚟。

跌嘅通常係細節。每段對話由 45 分度扣落嚟，漏一個日子、掉轉一個左右、跌咗個「如果」，每樣都係一個扣分位。總分要 63，每段又唔可以低過 29，一段特別好都補唔返另一段。

所以筆記嘅工作好窄：保住呢啲細節。落筆嘅標準得一條，就係呢件事錯咗會扣分，而你又冇把握淨靠記憶記得穩。

筆記寫乜：四樣一定要落筆

筆記唔會攞分，佢淨係幫你記住嗰 35 字。所以寫得越少越好，前提係唔可以漏。

• 數字同單位：銀碼、日期、劑量、期限、門牌。一聽到就落筆，用阿拉伯數字連單位（2 wk、3 mg、7 Aug）。日期唔好寫 7/8，過幾秒你自己都分唔清邊個係月份。
• 否定：冇、唔會、未、唔准。壓力之下最易掉轉，要用記號標死佢（✗ nausea）。「病人話唔想嘔」講成「病人想嘔」，呢個就算扭曲意思。
• 清單：聽到「帶身份證、收入證明同以前嘅租屋紀錄」，逐項一行。件數係數得出嚟嘅，漏一項就係明顯失分。
• 條件同專名：if、unless、如果、除非，用箭咀連住（✗ history → character ref）。Centrelink、Medicare、GP、TAFE 照抄英文，唔使喺呢一刻諗點譯。

其餘唔使寫。句子結構、語氣、客套說話，記憶頂得住；寫得越多，抬頭嗰陣要重新讀嘅嘢越多。

中文定英文寫都得，邊種快用邊種，多數人最後都係中英夾雜加符號。符號要早練，亦要係你自己嗰套——有香港考生嘅講法係「每人建立自己的速記符號系統」。

一段住屋對話，逐個片段拆開睇

下面三個片段嚟自我哋嘅廣東話筆記練習冊，每行筆記後面都有講解，話你知點解慳唔得嗰一筆。

need:
 - ID
 - proof income (e.g. bank stmt)
 - rental history
if ✗ history → character ref

✗ rental history
disadvantage?

can still apply w/o history
to show reliable:
 - employer ref
 - bank stmts (regular income)
 - proof savings

三個片段，筆記加埋都係十幾行。每行對住一件錯咗就扣分嘅嘢：文件逐項一行、「冇租屋紀錄」用 ✗ 標死、條件用箭咀連住。輪到你開口嗰陣，唔使重砌成段，對住呢幾行講就得。

睇十個範疇嘅完整筆記示範（要登記）

廣東話考生要專門練嘅四樣

呢四樣喺日常傾偈唔會出事，一計時就會。

• 講口語，唔好讀稿。 「請於七日內交回」係書面語，用粵音讀出嚟，喺中介面前好生硬；出口應該係「麻煩你七日之內交返」。緊張嗰陣最易跌返讀稿模式，所以練習一定要出聲，唔好用眼睇完就當練過。
• fifteen 同 fifty、thirteen 同 thirty。 聽落太似，唔好靠估。一聽到數字就落筆寫阿拉伯數字，連單位一齊寫，之後先諗點分組。
• 粵譯英要補主語同時態。 「同佢講咗，佢話星期五之前搞掂」冇主語冇時態；英文要出到 I told him and he said it would be done before Friday。
• 唔好跟普通話教材背譯文。 市面大部分粵語 CCL 材料由普通話機構製作，參考答案成日夾住「什麼、哪裡、多少錢」；跟住背，出口就會變咗普通話腔嘅廣東話。

NAATI 嘅語言政策點講廣東話

NAATI 有一份公開嘅 CCL 語言政策，粵語有自己一段，但佢冇話邊一種粵語先算標準。政策形容現代漢語分七大方言，粵方言其中一種英文叫 Cantonese，喺香港廣泛使用，亦係好多海外華人（包括唔少澳洲華裔居民）嘅母語，跟住就叫你參考兩條通用政策。廣州、澳門背景嘅考生唔使夾硬扮香港口音。

兩條通用政策對廣東話特別有用。一，同一種語言喺唔同地方會有用詞同用法差異，考官組知悉呢啲差異，評卷時會作出容許；同一條政策亦寫明考生本身要聽得明呢啲地區差異，即係錄音講嗰把口音未必同你屋企一樣。二，LOTE 使用者日常慣用嘅英文詞，唔會因此扣分。

第二條唔等於可以照夾。專有名詞同人人都咁講嗰啲字留得低；有現成廣東話講法嘅實義詞，講返廣東話先至穩陣。

地區差異有政策包住，唔一致就冇。一時「幾多錢」一時「多少錢」，聽落似兩個人喺度講嘢。

卡住嗰陣，繼續講落去

講到中間窒咗，最貴嘅反應係由頭再嚟。重複同長時間停頓當明顯猶豫扣分，而重新開始嗰下通常仲會蝕多幾個細節。

• 講到最尾。筆記唔齊，就用你記得嗰部分講到完，唔好中途停低重組。
• 唔好補嘢。唔肯定係咪「一定會轉介」，就唔好講成「一定」；加咗嘅同漏咗嘅一樣扣分。
• 唔好幫人解釋。你係傳話；佢講得含糊，你都要照含糊咁傳。
• 慢少少但一氣呵成，好過快而斷斷續續。口音唔喺評分範圍之內，明顯猶豫就係扣分項。

練法好實際：錄低自己，聽返嗰陣淨係數兩個數字——停咗幾多次，漏咗幾多件事。

四至六個星期可以點編

冇標準時數。下面呢個編排假設你一星期有三、四晚，每晚半個鐘到一個鐘。時間再少，就犧牲範疇數目，唔好犧牲出聲練習。

1. 第 1 星期：唔做筆記，用 NAATI 官方嘅免費練習試 行一次，做完列低自己漏咗啲乜，之後幾個星期照住呢張單分配時間。
2. 第 2 星期：一日一個範疇嘅詞彙，醫療、法律、住屋同 Centrelink 呢類社會服務排先。要求係講得出口，唔係認得就算。
3. 第 3 星期：加返筆記。同一段對話做兩次，一次淨靠記憶，一次靠筆記，睇下差幾遠。符號喺呢個星期定型。
4. 第 4 星期：兩段對話連住做，行足真試長度，中間唔停。用電腦內置嘅咪同喇叭，唔好戴耳機。
5. 第 5 至 6 星期（如果有）：只做最弱嗰兩個範疇，加每星期一次完整模擬，順便試埋房間同網速。
6. 考前兩日：唔好再學新符號，唔好開新範疇。

報名要行前少少。NAATI 話成績四至六個星期內電郵發出，資格由發出日起計五年有效，早考唔會蝕。

免費練習片點睇先有用

YouTube 上面嘅廣東話 CCL 內容比普通話少好多，有香港移民代辦都公開講過。所以好多人惟有睇普通話片：流程學得到，但耳仔成個月聽住嘅係另一種語言。我哋頻道嘅練習對話係廣東話原聲錄製。

睇片嘅方式決定佢有冇用。播之前擺定紙筆，聽完就出聲譯，唔好暫停、唔好倒帶，覺得譯得差都要講到嗰個片段完。錄埋自己把聲，之後對住原文數漏咗幾多件事。

短片練習

最新練習影片

• 2026年8月粵語 Cantonese NAATI CCL Practice: Centrelink — Payment Application
• 2026年7月粵語 Cantonese NAATI CCL Practice: GP Visit — Persistent Headaches
• 2026年6月粵語 Cantonese NAATI CCL Practice: Superannuation — Rollover Enquiry
• 2026年6月粵語 Cantonese NAATI CCL Practice: Employment Support — Job Search

去 YouTube 睇 完整練習對話 備試指南（英文）

睇完覺得自己做到，多數係錯覺。同一個片段你出聲做一次，通常會發現漏咗兩三樣。

考試當日：房間同器材

CCL 全部喺網上考，遠程監考（Televic 加 ProctorExam）。器材唔係考試內容，但器材一出事，就會食晒你考試嗰陣嘅專注力。

• 一部有鏡頭、咪同喇叭嘅電腦。唔准用耳機，即係你會用喇叭聽對話，練習嗰陣都要咁做。
• 一部手機或者平板做第二鏡頭。
• 網速至少 10 Mbps 下載、1.5 Mbps 上載。考試前幾日喺同一個位置測一次。
• 一間真係靜嘅房：關窗、同屋企人講聲。你部電腦嘅喇叭聲同你把聲會一齊入咪。

做筆記係 CCL 嘅一部分，但紙筆點擺、枱面要幾乾淨，考試前喺 naati.com.au 嘅考生指引度睇清楚。